Насловна
Деновиве, Општина Кисела Вода започна активности за подобрување на водоснабдувањето во месноста “Порупи” во селото Драчево. Имено, по налог на општината, екипи на фирмата Промонтинг ДООЕЛ – Скопје, започнаа градежни активности за подобрување на водоводната мрежа на главниот довод кон високата зона по улицата „Партизански Пат“. На оваа линија се поставуваат полиетиленски цевки со пречник Ф110 мм.
Согласно проектот, зголемувањето на капацитетот и квалитетот на водоводната мрежа ќе се изврши преку поврзување на водоводната мрежа од улицата “Јустинијан Први” (поранешна “Драчевска”), до изградената пумпна станица за високата зона и манастирот “Пеленица”, во должина од околу 554 метри. На местото на приклучок на улицата “Јустинијан Први” предвидена е изградба на приклучна шахта во која ќе бидат сместени сите потребни арматури и фасонски парчиња.
Оваа активност следи по изградбата на нова водоводна мрежа за месноста “Порупи” во 2009 година, со која се реши долгогодишниот проблем на жителите на ова населено место со малиот притисок на водата, особено во летниот период.
За оваа активност општината Кисела Вода од својот буџет издвои 4.431.067,00 денари, а градежните работи се очекува да завршат за околу 2 месеци.
Please wait...
