Насловна

Праксата за доделување решенија за легализација на бесправно изградени објекти во Кисела Вода на неделна основа, продолжува. Денес (27.12.), градоначалникот Беличанец – Алексиќ предновогодишно израдува 45 жители на општината и им додели решенија за легализација.

Градоначалникот најпрвин им ги честиташе престојните празници на присутните граѓани, а потоа ги информираше и за динамиката на процесот на легализација во општината.  Беличанец – Алексиќ укажа на фактот дека по воведувањето на неколку технички мерки во одделението за легализација, општината во просек доделува од 40-50 решенија на неделна основа и потенцираше дека главната улога во овој процес, покрај општината, ја имаат и граѓаните.

-“Впрочем, оваа пракса за делење решенија за легализација на неделна основа ја има токму таа функција – да упати апел до сите граѓани кои немаат изготвено геодетски елаборат, да го сторат истото во најкраток можен рок, бидејќи со некомплетна документација, односно без елаборат го доведуваат во прашање легализирањето на објектот” – изјави Беличанец – Алексиќ и потсети дека крајниот рок за доставување на елаборатот е 18-ти јуни 2014 година.

Согласно статистичките податоци на општината, околу 4337 граѓани од Кисела Вода имаат само уште  неколку месеци за да ја докомплетираат документацијата, односно да го достават геодетскиот елаборат.  

Градоначалникот повторно упати апел до сите жители на општината, до сите правни и физички лица да не го злоупотребуваат процесот на легализација и да градат нелегално во овој вакуум простор, бидејќи како што рече, ќе се соочат со општинската градежна инспекција.

-“Сакам да Ве информирам дека Општинската градежна инспекција е перманентно на терен и секоја нелегална градба која ќе се детектира, а истата не е подведена под Законот за третман на бесправно изградени објекти, односно нема легална документација за градба, веднаш ќе биде срушена. Под ова се подразбира секоја доградба и надградба на постоечките нелегални објекти, но и секоја нова градба која е започната, а е со некомплетна документација и не се гради во согласност со нормативите на Законот за градење” – заврши Беличанец - Алексиќ.

• < Prev
• Next >