Насловна
На 1300 метри квадратни во реконструираното подрачно основно училиште “Кузман Јосифовски Питу”, младите ќе можат да играат фудбал, кошарка и ракомет. За игралштето, кое е дел од владината програма за изградба на повеќе спортски терени, Владата на Република Македонија, преку Агенцијата за млади и спорт, издвои 8 милиони денари.
Овој проект е дел од низата капитални проекти на владата во спортот. Целта на потикнување на спортот и здравите навики кај младите и можноста да се помогне во развојот на талентите, се мотив Владата на Република Македонија да инвестира во изградба на 180 спортски сали, 50 фудбалски игралишта и 120 тениски терени низ целата држава.
- Квалитетното училишно образование претставува важен услов за сoздавање на квалитетна и креативна младина, како важен генератор во стопанскиот и севкупниот општествен развој. Не помалку важни се инвестициите во спортот кои не само што придонесуваат за изградба на млади генерации, туку помагаат и во јакнење на спортскиот натпреварувачки дух, истакна премиерот Груевски.
Директорот на агенцијата за млади и спорт изјави дека со изградбата на повеќенаменското игралиште се поттикнуваат младите генерации активно да се занимаваат со спорт.
- Спортот има сила да го менува светот, да ги обединува луѓето и да создава здрава младина, а ние сме тука да го овозможиме тоа. Спортот е вистински амбасадор на државите, ги обединува нациите и ги прави горди, а општина Кисела Вода отсекогаш била расадник на спортски таленти, рече Спасески.
Градоначалникот на општина Кисела Вода нагласи дека е посебна чест да се обрати пред комплетно реконструираниот комплекс, кој претставува исполнување на едно големо ветување, за враќање на духот и функционалноста на подрачното основно училиште “Кузман Јосифовски Питу”.
Енергетската обнова на училишната зграда опфати замена на прозорците и целосната столарија. Комплетна реконструкција на покривот на кој се постави термичка изолација и систем за заземјување-громобранска заштита и снего брани. Замена на постојните оштетени и дотраени олуци. Заради поголема изолација, објектот е обложен со нова, енергетски ефикасна фасада.
Реконструкцијата на училиштето чинеше 6 милиони денари, кој општина Кисела Вода ги обезбеди во соработка со програмата за развој на обединетите нации, чиј претставник, Г-ѓа Луиза Винтон, денес ги поздрави присутните, притоа истакнувајќи ја успешната соработка со општина Кисела Вода која ќе продолжи и во иднина преку реализација на проектот за набавка на комплетно нова опрема и ефикасно био гориво.
Дополнително Градоначалникот Беличанец го најави и проектот за најмалите жители во оваа општина кој е во завршна фаза. Имено еден дел од истоименото училиште ќе биде пренаменет во градинка со капацитет да прифати 55 деца.
Целокупната сума од 3 милиони денари потребни за реконструкција и преадаптација беше обезбедена од буџетот на општина Кисела Вода.
За комплетирање на овој проект и обезбедување на опрема за градинката, со цел почеток на воспитно образовниот процес во почетокот на наредниот месец, дополнителни средства ќе бидат обезбедени од Владата на Република Македонија преку Министерството за труд и социјална политика.
- Враќањето на децата во подрачните училишта и изградба на градинки во одредени делови од општината е идеја која ја најавив со почетокот на мојот мандат.
Денес идејата стана реалност. Доказ за тоа е и денешниот настан во чест на создавање на подобри услови за образование, едуцирање и спортување. Тоа е и ќе остане приоритет, како за Владата на Република Македонија, така и за општина Кисела Вода, истакна Градоначалникот Билјана Беличанец Алексиќ.
Please wait...
