На настанот се обрати градоначалникот на Општина Кисела Вода, Билјана Беличанец – Алексиќ, која потсети на космополитската улога на Фредерик Шопен во светското музичко наследство.
-“Единствениот јазик на кој не му треба превод, а го разбираат сите ширум светот – е јазикот на музиката. А, пак музиката на Шопен претставува нешто многу повеќе од тоа. Заснована на начелата на хуманизмот, општо цивилизациските и европските вредности, музиката на Шопен ја отсликува космополитската идеја за чиста уметност. Варшавјанин по род, по срце Полјак и граѓанин на светот по талент, е вистинската дефиниција за универзално препознатливиот гениј на Романтизмот” – потенцираше Беличанец – Алексиќ, напоменувајќи дека Општина Кисела Вода е единствена општина во Република Македонија, која има чест една од улиците на нејзината територија да е именувана по овој светски музичар.
Пофални зборови за организацијата имаше и вршителот на должноста Амбасадор на Република Полска во Република Македонија, г-ѓица Марта Пшениосло, која напомена дека соработката со општината Кисела Вода на полето на културата се одвива на највисоко ниво и изрази надеж ваквата соработка да се продлабочи и во други сфери.