На самиот почеток, се обрати градоначалникот Ѓорѓиевски, кој ги поздрави присутните и го нагласи социјалниот аспект на настанот.

-Големо е моето задоволство што денес сме сите заедно тука, на Новогодишниот хуманитарен базар кој има за цел да донесе празнично расположение, а најмногу од се’ да ги израдува нашите најмлади жители, дечињата од Општина Кисела Вода. И во овој настан, како и во настаните кои Општина Кисела Вода во иднина ќе ги реализира, се потрудивме да вметнеме нота на социјална инклузивност, па организацијата на истиот ја поделивме заедно со Здружението „Куќа на среќата“ и „Здружение на родители на деца заболени од церебрална парализа“- Скопје.

Изработките кои денес се на продажба по симболични цени ги изработија дечињата од градинките во општина Кисела Вода и децата од неколку од  здруженијата. Средствата од продажбата, пак, ќе се наменат во хуманитарни цели, за потребите на лицата со попреченост-истакна градоначалникот Ѓорѓиевски, кој потоа, заедно со градоначалничката Арсовска, ги посетија и купуваа од штандовите со изработки.

Настанот продолжи со интересна музичко-сценска програма во која беа вклучени учесници од сите генерации. Свој штанд имаше и Одделението за превенција при СВР Скопје коe на присутните им делеше едукативни летоци за безбедно славење на Новата година без употреба на пиротехнички материјал.

На крајот, За децата со попречености се поделија новогодишни пакетчиња, пактчиња добија и децата на вработените во општината, како и повеќе други дечиња кои беа во паркот и се сликаа со Дедо Мраз. Пакетчињата, преку донации се обезбедени од страна на градоначалникот Орце Ѓорѓиевски.

• < Prev
• Next >