Целта на проектот е подобрување на безбедноста во детските градинки преку воведување на протоколи за прва помош и спроведување обука на негувателки и воспитувачи.

Обуката и тестирањето се базирани врз стандардите и препораките на Американската Академија за Педијатрија. Комплетниот материјал беше подготвен од стручен тим од Клиниката за детски болести од одделот за Интензивна нега и терапија. Едукациите ги спроведува д-р Милена Спиркоска, специјализант од Клиниката за детски болести. Учесниците ќе добијат сертификати по завршениот контролен тест.

Идејата и барањето за проектот дојдоа од директорката на “8 Март”, Снежана Кливановска. Потоа се вклучи и Детска клиника, каде што “Линк Акрос” помогна да се отвори Ургентен центар во 2014. Детални припреми за проектот започнаа откако Министерството за труд и социјална политика даде согласност за истиот.

Со овој проектот ќе се зајакне капацитетот на градинките, како една од првите алки во синџирот на ургентна медицина-да постапуваат адекватно во ургентни ситуации. Покрај зголеменото знаење и вештините кај персоналот, една од важните придобивки од проектот ќе биде и изготвување на протоколи за постапување во ургентни ситуации како и препораки за понатамошно проширување на проектот.

Во пилот проектот учествуваат четири детски градинки од четири различни општини во Скопје и тоа: “8 Март” (Кисела Вода), “Детска Радост” (Гази Баба), “Фидани” (Чаир) и “11 Октомври” (Бутел). Обуката е полудневна и вклучува теоретски и практичен дел. Вкупен број на учесници во проектот е 200 негуватели и воспитувачи.

• < Prev
• Next >