Потенцирајќи ја големината на денешниот ден, министерот Ристовски информираше дека денес, во сите основни и средни училишта ширум државата се одржува час на кој се дискутираат теми посветени на учеството на Македонија во антифашистичката борба и теми поврзани со создавањето на најголемото европско семејство.
-На овој ден се одбележуваат две огромни победи, победата над фашизмот, најголемото зло што можеше да му се случи на човештвото и победата која е извојувана кога е создадено големото европско семејство, односно ЕУ-истакна министерот Ристовски, појаснувајќи дека изборот за посета на ОУ “Кузман Јосифовски –Питу” не е случаен.
-Oва училиште го носи името на еден од најголемите идеолошки творци на борбата за слобода и независност во Македонија во текот на втората Светска војна и еден од најголемите борци против фашизмот-изјави министерот Ристовски.
Честитајќи им го овој значаен ден на сите граѓани на Македонија, градоначалникот Беличанец-Алексиќ укажа на важноста на едуцираноста за историските текови во кои се наоѓа нашата земја.
-Сметаме дека познавањето на своето минато, на минатото на земјата која го избрала вистинскиот пат за време на Втората Светска Војна и која и денес, континуирано продолжува да ги прави вистинските избори и да се движи кон целосно интегрирање во европските и евроатланските процеси, не е само потреба туку неопходност за секој поединец . Одбележувањето на 9 Мај, значи почит кон историјата и трасирањето на европската перспектива на Република Македонија.
Во рамки на посетата, покрај предавањето за овие два значајни настани од историјата, осмоодделенците од ова училиште во непосредна дискусија со министерот и градоначалникот, ги отворија прашањата за македонскиот училишен систем и следењето на европските текови кога е во прашање образованието. Министерот Ристовски потенцираше дека Македонија го следи чекорот со европските образовни институции наведувајќи дека македонските ученици на користење ги имаат најквалитетните учебници кои ги ги користат и учениците во Велика Британија кои, пак, имаат еден од најквалитетните образовни системи и дека сме една од ретките земји која на идните студенти им овозможува комплетно стипендирање за студирање на најквалитетните светски универзитети.
Градоначалникот Беличанец-Алексиќ, како една од европските мерки кои ги применуваме во нашиот училишен систем го наведе екстерното тестирање, кое деновиве е актуелно.
-Идејата за екстерното оценување е нешто кое е преземено од ЕУ кон која се стремиме и со која треба да си ги измериме силите-до каде сме стасани со образовниот процес и сето она што е пропуштено да биде надокнадено-истакна Беличанец-Алексиќ.
Заклучи дека македонските ученици не заостануваат зад своите европски соученици и дека ова е генерацијата што ќе го донесе вистинскиот развој на Македонија.
Please wait...
