Насловна

Со низа случувања, денес, општина Кисела Вода го одбележува Ѓурѓовден, еден од поголемите пролетни празници што го празнува не само христијанското, туку и целото население во Македонија  и во чија основа е будењето на природата и празнувањето на животот.

Според Библијата, овој ден му е посветен на светецот Ѓорѓија Победоносец кој издржал најсурови мачења, но останал истраен во својата верба во Бога. Црквата посветена на овој светец, лоцирана во населба Кисела Вода, според некои легенди датира уште од времето на Јустинијан, односно од почетокот на 6 век и жителите на Кисела Вода, денешниот празник го прославуваат од дамнина. Токму затоа општината пред 15 години одлучи да започне со чествување на овој ден како патронен празник.

Симболично, одбележувањето на 6 Мај, комплетно организирано  од страна на градоначалникот Билјана Беличанец-Алексиќ и општинските служби, започна со литургија во црквата Св. Ѓорѓи на која присуствуваше делегација од општината. Во 11 часот започна цветното цветното дефиле во кое учествуваа  неколку стотини деца од градинките и училиштата на територија на општина Кисела Вода.

Дел од нив, до крстосницата “Народни херои” со булеварот “Борис Трајковски”,каде  се одржа оваа цветна приредба, пристигнаа  со двокатните панорамски автобуси и се вклучија во поворката предводена од градскиот пајтон и лунапарковското вовче.

Се  движеа  до паркот Шопен каде во 12 часот се одржа пригодна програма со настапи на ученици од речиси сите училишта во општината.

Случувањата врзани со прославата на патрониот празник, продолжија и во попладневните часови. Во 18 часот, се одржа концерт на Културно Уметничките Друштва од општината , бидејќи и фолклорот е дел од нашето минато и традиција и одбележје по кое сме препознатливи во светот. 

 Со сплет ора од Источна Македонија и со Мариовска Тресеница се претстави КУД "Китка".

Свој настап со два сплета на игри - „Лазаренки“ и „Сплет на игри од Малешевијата“ имаше и КУД "Никола Јонков Вапцаров".

Како и секоја година, патронатот се одбележува и со спортски активности, кои поради временските услови, оваа година се поместени за в петок. Конкретно, ќе се одржи атлетска трка на основците од училиштата лоцирани во општина Кисела Вода која ќе стартува од пред МЗ Драчево и ќе се одвива на ул. “Ратко Митровиќ” се до пазарот во село Драчево.

• < Prev
• Next >