Општина Кисела Вода го одбележа Светскиот ден на мајчиниот јазик. Во големата сала на општината беше организирана пригодна свеченост на која беа доделени наградите на учениците кои учествуваа на литературниот и ликовниот конкурс на тема “Мојот мајчин јазик е моето постоење, мојата иднина.
За литературниот конкурс, првите места им припаднаа на Деспина Ниневска, ОУ “Круме Кепески”, во категорија I – V одд и Теодора Димоска од ОУ “Невена Георгиева – Дуња” , во категорија од од VI – VIII одд. Дополнителна награда за прозен текст се додели на осмоодделенката Бојана Станковска од ОУ “Св.Климент Охридски”.
За ликовениот конкурс првонаградени се Ана Ѓорчевска од ОУ “Кузман Шапкарев” во категорија од I одд. до V одделение и Милена Лазин ООУ “Партенија Зографски” во категоријата од VI одд. до VIII одделение. Дополнителна награда за ликовна творба за изработка доби Марија Вецовска од ООУ “Кузман Јосифовски Питу”.
Во рамките на чествувањето на Светскиот ден на мајчиниот јазик беше одржана трибина на која Д-р Благица Петковска , професор на Педагошкиот факултет “Св.Климент Охридски” говореше на тема “Како да се подобри говорната култура”, д-р Веселинка Лаброска, научен советник во Институтот за македонски јазик ”Крсте Петков Мисирков” за свое излагање ја одбра темата “Македонистиката и мајчиниот македонски јазик”, а професорорт Раско Лозановски од Сојузот на просветни работници зборуваше за примената на македонскиот литературен јазик во администрацијата на училиштата , во јавноста на локалната средина и пошироко.
21 февруари е прогласен за Меѓународен ден на мајчиниот јазик на XXX седница на Генералната конференција на УНЕСКО во 1999 г. Во 2000-та, овој датум е промовиран како Ден на лингвистичка и културна разновидност и повеќејазичност.
Please wait...
