За околу два месеца треба да завршат градежните активности за подобрување на условите во подрачното основно училиште “Кузман Јосифовски-Питу” во Црниче.
Согласно проектот кој го изготви “Прима Инженеринг-Скопје”, се имплементираат мерки за енергетска ефикасност-се заменуваат прозорците и целосната столарија, комплетно се реконструира покривот на кој се поставува термичка изолација и систем за заземјување-громобранска заштита, како и снегобрани. Се заменуваат и постојните оштетени и дотраени олуци. Заради поголема изолација, објектот ќе биде обложен со нова, енергетски ефикасна фасада.
Проектот e вреден 6 милиони денари, од кои 4 милиони обезбеди општина Kисела Вода, а 2 милиона се донација од УНДП, како дел од програмата за имплементација на мерките за енергетска ефикасност во образованието.
Екипите на фирмата изведувач “Конструктор Рената и други” од Скопје, работат интензивно и за време на викендот за да им се излезе во пресрет на учениците кои ја следат наставата во другиот дел од објектот кој ќе се реновира по завршувањето на градежните активности во првиот.
Паралелно со реконструкцијата на училиштето, во неговиот двор, работат екипите на фирмата “Бауер БГ”. Се гради новото повеќенаменско игралиште, финансирано од Владата на РМ, преку Агенцијата за млади и спорт. На површина од 1.300 метри квадратни ќе има два гола за мал фудбал и ракомет и четири коша. Ќе располага со сите спортски реквизити и урбана опрема и ќе биде осветлено за да се користи и навечер.
Инаку , ПОУ “Кузман Јосифовски-Питу” е изградено во 1986 година. Од тогаш во него не се вршени никакви реконструктивни зафати. По завршувањето на градежните активности учениците ќе добијат одлични услови за одвивање на воспитно-образовниот процес ,што е еден од врвните приоритети на општина Кисела Вода.
Please wait...
